लम्पी स्किन रोगविरुद्धको सप्ताहव्यापी खोप अभियानमा बागमती प्रदेशमा ९६ हजार गाईभैंसीमा खोप लगाइएको छ। प्रदेशका १३ जिल्लामा भदौ १ बाट सुरु अभियानमा ९६ हजार ३ सय ४७ गाईभैंसीमा खोप लगाइएको हो । प्रदेशको कृषि तथा पशुपन्छी विकास मन्त्रालयले १ लाख २० हजार गाईभैंसीमा खोप लगाउने लक्ष्य लिएको थियो । यो अभियानमा लक्ष्यको ८० दशमलब २९ प्रतिशत मात्रै पूरा भएको छ । प्रदेशका १३ जिल्लामध्ये सबैभन्दा धेरै मकवानपुरमा खोप लगाइएको छ । २४ हजार ६ सय ९५ डोज मकवानपुरमा खोप लगाएको पशु सेवा कार्यालय मकवानपुरका प्रमुख डा ब्रजकिशोर ठाकुरले जानकारी दिए ।
सबैभन्दा कम खोप ललितपुरमा लगाइएको छ । ललितपुरलाई उपलब्ध गराइएको १० हजार डोज खोपमध्ये ३ हजार ६ सय ९ डोज मात्रै खोप लगाइएको छ । सबैभन्दा बढी खोप पाएको पशु सेवा कार्यालय चितवनमा सप्ताहव्यापी अभियानभर जम्मा ६ हजार डोज मात्रै खोप लगाइएको छ । चितवन बागमती प्रदेशको १३ जिल्लामध्ये सबैभन्दा धेरै पशुपालन हुने जिल्ला हो ।
मन्त्रालयका वरिष्ठ पशु विकास अधिकृत एवं पशुपन्छी विकास महाशाखा प्रमुख डा रामप्रकाश प्रधानका अनुसार चितवनमा गाईको संख्या ९२ हजार २ सय ५६ छ भने भैसीको संख्या ७२ हजार २ सय छ । दूध उत्पादनको क्षेत्रमा चितवन प्रदेशकै पहिलो जिल्ला हो । मन्त्रालयका अनुसार चितवनमा वार्षिक ९५ हजार १ सय ४८ मेक्ट्रिक टन दूध उत्पादन हुने गरेको छ ।
यसरी दूध उत्पादनदेखि गाईभैंसीको संख्यासमेत सबैभन्दा धेरै रहेको र मन्त्रालयले सबैभन्दा धेरै ३० हजार डोज खोप उपलब्ध गराएको थियो । चितवनमा रहेका गाईभैंसी फार्महरुले आफैले किनेर खोप लगाएकाले यो अभियानमा खोप कम लगाइएको मन्त्रालयको भनाइ छ । भदौ १ देखि ७ सम्म लम्पी स्किन रोगविरुद्धको सप्ताहव्यापी खोप अभियान सञ्चालन गरिएको हो । बागमतीका १३ जिल्लामा ४ लाख ८१ हजार ७ सय ७१ मेक्ट्रिक टन दूध उत्पादन हुँदै आएको छ। मन्त्रालयका अनुसार बागमतीका ११९ स्थानीय तहमा ६ लाख ९४ हजार २ सय १७ गाई र ५ लाख ४९ हजार १ सय ८२ भैंसी रहेका छन् ।
पालिका प्रेस
थप जानकारी
प्रतिक्रिया दिनुहोस्