गोकर्णेश्वर नगरपालिका वडा–४ स्थित माकलबारीमा जया देवकोटा मेमोरियल चिडियाघर तथा संग्राहलय स्थापना भएको छ ।

२३ माघमा एक कार्यक्रमको आयोजना गरी गोकर्णेश्वर नगर प्रमुख सन्तोष चालिसेमार्फत सो चिडियाघर तथा संग्राहलयको उद्घाटन गरेका हुन् । चिडियाघर तथा संग्राहलयको उद्घाटन कार्यक्रममा बोल्दै नगर प्रमुख चालिसेले जया देवकोटा मेमोरियलले गरेको कामलाई प्रशंसा गरेका छन् । नगरपालिकाभित्र शिक्षण प्रक्रियालाई नयाँ अवधारणा ल्याएर अध्यपन गराएकोमा व्यवस्थापन पक्षलाई धन्यवाद दिदै संग्राहलयलाई राष्ट्रिय रुपमा प्रचारका लागि स्थानीय सरकारबाट आवश्यक सहयोग गरिने प्रतिवद्धतता व्यक्त गरे ।

लामो समयदेखि शैक्षिक क्षेत्रमा सहभागीता जनाउँदै आएको जया देवकोटा मेमोरियलले पछिल्लो समय प्रयोगात्मक शिक्षण सिकाई र विद्यार्थीहरुलाई व्यवहारिक रुपमा परिर्वतन ल्याउन रचनात्मक तथा सिर्जनशील कार्यहरु गर्दै आइरहेको छ । जया स्मृृति अन्र्तगत मनकामना स्कूल, जया मल्टिपल क्याम्पस लगायत शैक्षिक संस्थाहरु सञ्चालन गर्दै काठमाडौँको  पूर्वोत्तर भेगमा उत्कृष्ठ जनशक्ति उत्पादन गर्दै आएको छ ।

त्यस्तै शिक्षालाई रचनात्मक र व्यवहारि बनाउन प्रयोगात्मक विधिहरु अनुसरण गराउदै विद्यार्थी तथा अभिभावकलाई अध्ययन र अवलोकनका लागि संग्राहलय तथा चिडियाघर निर्माण गरेको व्यवस्थापक पक्षले जनाएको छ । करिब ९ रोपनी क्षेत्रफल जमिनमा फुटसल समेत निर्माण गरी खेल जीवनलाई सरल र सहज बनाई राष्ट्रिय स्तरको खेलाडी समेत उत्पादन गर्दै आईरहेको जया मल्टिपल क्याम्पस प्रमुख भावनी पौडेलले बताए । चिडियाघरमा प्रत्यक्ष रुपमा विभिन्न पशुपंक्षिहरु र संग्राहलयमा नेपाली मौलिकता झल्काउने हस्ताकला निर्माण सामाग्री, परम्परागत कृषि सामाग्री तथा लोक बाजाहरुको दृश्यावलोकन गर्न पाउने क्याम्पस प्रमुखले बताए ।

माकलबारीमा रहेको सो संग्राहलय तथा चिडियाघरमा  मानव निर्मित कलात्मक मूर्तिहरु हात्ती, एक सिंगे गैंडा, बाघ, सिंह, डाइनोसर र चिडियाघरभित्र भेडा, खरायो, बाख्रा, टर्की, फाइटर भाले, लोकल भाले, परेवा, लौकाट, कालिज, कडकनाथ, राज हाँस, बट्टाई लगायत जीवित पशुपंक्षिहरु देख्न सकिन्छ । साथै संग्राहलयभित्र हलोजुवा, ठेकी, मदनी, ढिकीजाँदो, थुन्चे, भकारी लगायत थुप्रै हस्ताकला सामाग्रीहरु दृश्यावलोकन गर्न सकिन्छ ।

पालिका प्रेस
थप जानकारी